BENER TAPI TEU PANTES BENER TAPI SALAH

Para saderek aya sababaraha kautamaan nyiar rizki, di antarana wae nyaeta agama Islam neuteupkeun yen usaha nyiar rezki teh kaasup ibadah anu baris meunang pahala kawas ibadah-ibadah sejenna.

Kanjeng Nabi saw pernah sasauran, “ Ibadah teh aya 10 bagian, 9 bagian diantarana aya dina usaha nyiar rezki anu halal “ Malahan leuwih ti kutu usaha teh kaasup jihad fi sabilillah asal make niat jeung cara anu dimeunangkeun ku agama.

Islam kacida nyelanya ka jalma anu gawena ngan ukur riweuh balas ku ngaggur  tea, mangka sagala kabutuhna teu bisa kacumponan, anu ahirna hirupna ngan ukur gumantung ka nu sejen, jadi pangbeubeurt masyarakat.

Ari pangangguran teh sumber kamiskinan, sedeungkeun kamiskinan teh mangrupakeun tempat anu subur pikeun timbulna rupa-rupa kajahatan jeung kakacouwan. Teu saeutik kajadian ayana krisis rumah tangga, krisis akhlaq atawa moral ku lantaran tekanan ekonomi anu kacida beuratna. Ku lantaran kitu kawajiban urang sarerea pikeun ngajauhan sagala bentuk pangangguran. Ku cara kieu hartina urang geus ngilu nartibkeun jeung mereskeun kaayaan masyarakat.

Teu bisa dibenerkeun ku agama, jalma anu nganggurna teh ku lantaran beurang peuting waktuna beak dipake ibadah nepi ka manehna teu boga gawe. Memang ari ngaggur mah heunteu tapi waktu keur usahana nyiar rezki beakeun ku wiridan, puasa, jeung sajabana. Kaayaan saperti kiyeu pernah kajadian dina mangsa Rasulullah saw masih keneh jumeneng.

Sababaraha urang sahabat ngahaja nepangan Kanjeng Nabi saw, maksadna ngadugikeun rasa heran ku hiji jalma anu getol ibadahna, nepi ka sakabeh waktuna boh beurang atawa peuting dibeakeun malulu keur ibadah. Lamun ti beurang manehna terus-terussan puasa, ari ti peuting dieusian ku shalat, wiridan, dzikir ka Gusti Allah. Sau Rasul, “ Aranjeun kabeh leuwih hade ti batan eta jalma “.

Anu jelah mah urang sadaya yen digawe atawa usaha nyiar rezki teh ngarupakeun kawajiban manusa dina hirupna. Digawe ngarupakeun pangutama-utamana pikeun meunangkeun rezki atawa harta banda.  Digawe kaasup ibadah anu baris meunang pahala, malahan mah sajajar anjenna jeung jihad fi sabilillah pikeun najeurkeun agama Allah.

Ku kiuna hayu urang tawakal ka Gusti Allah sabab anu nagtukeun sagalana teh ngan Mantenna. Manusa saderma usaha tapi hasilna aya dina katangtuan Gusti Allah swt. Rasulullah saw kantos neurangkeun, “Lamun aranjeun tawakal ka Gusti Allah kalawan sabener-benerna tawakal, tangtu Gusti Allah baris masihan rezki ka aranjeun, saperti Gusti Allah geus masihan rezki  ka manuk anu indit tina sayangna isuk-isuk bari telihna kosong, balikna mah sore telhna buncir “ ( HR Ibnu Majah  jeung Tirmidzi ).

Duh Gusti Anu Maha Agung , Anu Maha Kawasa mugi Gusti ngajantenkeun usaha abdi sadidinten kalebet kana ibadah sapertos ibadah-ibadah anu sanesna. Mugi Gusti neubihkeun ka abdi sadaya tina usaha anu teu halal, tina usaha baris ngarugikeun abdi jeung anu sanes. Nun Gusti pasihan abdi sadaya  kasaean boh di dunya nya kitu di akherat, sareng mugi abdi ditebihkeun tur disalametkeun tina seuneu naraka.